पुणे: पुणे जिल्ह्यातील सत्तेचे शक्तिपीठ समजल्या जाणाऱ्या जिल्हा परिषद आणि पंचायत समितीच्या निवडणुकांचे बिगुल अखेर वाजले आहे. प्रशासनाने या निवडणुकांचा अधिकृत कार्यक्रम जाहीर केला असून, जिल्ह्यातील ७३ जागांसाठी ही अटीतटीची लढत होणार आहे. या घोषणेमुळे ग्रामीण भागातील राजकीय हालचालींना वेग आला असून इच्छुकांनी आतापासूनच मोर्चेबांधणी सुरू केली आहे.
निवडणुकीचा संपूर्ण ‘टाईम-टेबल’ खालीलप्रमाणे:
निवडणूक आयोगाच्या सूचनेनुसार, जानेवारी महिन्याच्या मध्यात उमेदवारी अर्ज भरण्याच्या प्रक्रियेला सुरुवात होईल.
उमेदवारी अर्ज भरणे (Nomination): १६ जानेवारी ते २१ जानेवारी या कालावधीत इच्छुकांना आपले उमेदवारी अर्ज दाखल करता येतील.
अर्जांची छाननी (Scrutiny): २२ जानेवारी रोजी दाखल झालेल्या अर्जांची कायदेशीर छाननी केली जाईल.
माघार आणि अंतिम चित्र: २७ जानेवारी ही अर्ज मागे घेण्याची शेवटची तारीख असेल. याच दिवशी दुपारी उमेदवारांची अंतिम यादी प्रसिद्ध करण्यात येईल आणि अपक्ष उमेदवारांना चिन्ह वाटप केले जाईल.
मतदान (Polling): ५ फेब्रुवारी रोजी संपूर्ण जिल्ह्यात मतदान प्रक्रिया पार पडेल.
निकाल (Result): ७ फेब्रुवारी रोजी मतमोजणी होईल आणि त्याच दिवशी जिल्ह्याचा ‘कारभारी’ कोण, याचा फैसला होईल.
७३ जागांवर राजकीय दिग्गजांची प्रतिष्ठा पणाला
पुणे जिल्हा परिषद ही राज्यातील सर्वात महत्त्वाची जिल्हा परिषद मानली जाते. एकूण ७३ जागांवर होणाऱ्या या निवडणुकीत प्रस्थापित नेत्यांसोबतच अनेक तरुण चेहरे नशीब आजमावणार आहेत. महाविकास आघाडी आणि महायुतीमधील घटक पक्ष ही निवडणूक स्वतंत्र लढणार की युतीने, याकडे संपूर्ण राज्याचे लक्ष लागले आहे.
प्रचाराचा धुरळा उडणार
२७ जानेवारीला चिन्ह वाटप झाल्यानंतर उमेदवारांना प्रचारासाठी जेमतेम आठवडाभराचा काळ मिळणार आहे. त्यामुळे सोशल मीडिया, कोपरा सभा आणि घरोघरी जाऊन प्रचार करण्यावर उमेदवारांचा भर असणार आहे. थंडीच्या वातावरणात आता पुणे जिल्ह्याचे राजकीय वातावरण मात्र चांगलेच तापणार असल्याचे दिसून येत आहे.
About the Author
