पिंपरी–चिंचवड | प्रतिनिधी(दि.१३/१/२०२६)पिंपरी चिंचवड महानगरपालिका निवडणुकीच्या पार्श्वभूमीवर प्रभाग क्रमांक २ मध्ये राजकीय वातावरण तापले असून, मराठा समाजासह विविध मराठा संघटनांनी राष्ट्रवादी काँग्रेस पक्षाचे अधिकृत उमेदवार वसंत बोराटे यांना जाहीर पाठिंबा देत राजकीय समीकरणे बदलण्याची शक्यता निर्माण केली आहे.
मराठा समाजाच्या विविध संघटनांच्या पदाधिकाऱ्यांची आणि कार्यकर्त्यांची एक महत्त्वपूर्ण संयुक्त बैठक नुकतीच पिंपरी चिंचवड येथे पार पडली. या बैठकीत प्रभाग क्रमांक २ मधील नागरिकांना भेडसावणाऱ्या मूलभूत समस्यांवर सविस्तर चर्चा करण्यात आली. पाणीपुरवठा, अंतर्गत रस्त्यांची दुरवस्था, ड्रेनेज व्यवस्था, आरोग्य सेवा, शैक्षणिक सुविधा, महिला सुरक्षेचे प्रश्न तसेच बेरोजगार तरुणांसाठी रोजगाराच्या संधी या मुद्द्यांवर विशेष भर देण्यात आला.
या चर्चेनंतर वसंत बोराटे यांनी आतापर्यंत केलेले सामाजिक कार्य, सर्व समाजघटकांशी असलेला थेट संपर्क, तसेच प्रभागाच्या सर्वांगीण विकासासाठी मांडलेली ठोस आणि वास्तववादी विकासदृष्टी लक्षात घेऊन त्यांना पाठिंबा देण्याचा निर्णय सर्व मराठा संघटनांनी एकमताने घेतला.
यावेळी समाजाच्या ज्येष्ठ पदाधिकाऱ्यांनी आपले मत व्यक्त करताना सांगितले की, “प्रभाग क्रमांक २ चा समतोल आणि शाश्वत विकास साधायचा असेल, तर अनुभव, लोकसंपर्क आणि काम करण्याची इच्छाशक्ती असलेले नेतृत्व आवश्यक आहे. वसंत बोराटे यांनी याआधीही विविध सामाजिक उपक्रमांद्वारे सर्वसामान्य नागरिकांच्या प्रश्नांना न्याय देण्याचा प्रयत्न केला असून, त्यांची कार्यपद्धती विश्वासार्ह आहे.”
तरुण प्रतिनिधींनी बोलताना नमूद केले की, “तरुणांचे प्रश्न समजून घेणारे आणि त्यांना मुख्य प्रवाहात आणण्यासाठी प्रयत्न करणारे नेतृत्व आजच्या काळाची गरज आहे. शिक्षण, क्रीडा, स्टार्टअप्स व स्वयंरोजगाराच्या संधी निर्माण करण्याबाबत वसंत बोराटे यांची भूमिका सकारात्मक आहे.”
या पाठिंब्याबाबत प्रतिक्रिया देताना वसंत बोराटे यांनी मराठा समाजासह सर्व समाजघटकांचे आभार मानले. ते म्हणाले, “हा पाठिंबा माझ्यासाठी जबाबदारी वाढवणारा आहे. प्रभाग क्रमांक २ मधील प्रत्येक नागरिकाचा विश्वास सार्थ ठरवण्यासाठी मी पारदर्शक, विकासाभिमुख आणि सर्वसमावेशक काम करण्यासाठी कटिबद्ध आहे.”
पाठिंब्याच्या घोषणेनंतर परिसरात राष्ट्रवादी काँग्रेस पक्षाच्या कार्यकर्त्यांमध्ये उत्साहाचे वातावरण निर्माण झाले असून, या निर्णयामुळे प्रभाग क्रमांक २ मधील निवडणूक अधिक चुरशीची होण्याची शक्यता असून, मराठा समाजाचा हा एकसंघ पाठिंबा निवडणुकीत निर्णायक ठरेल, असा विश्वास राजकीय विश्लेषकांनी व्यक्त केला आहे.
About the Author
