ऑलिम्पिक पदक जिंकून देणारे खेळाडू महाराष्ट्रात मोठ्या संख्येने तयार होण्यासाठी राज्याच्या शहरात गावखेड्यात, वाडीवस्तीवर क्रीडासंस्कृती रुजवावी, असे आवाहन उपमुख्यमंत्री तथा महाराष्ट्र ऑलिम्पिक संघटनेचे अध्यक्ष अजित पवार यांनी आज केले. टोकियो ऑलिम्पिकमध्ये प्रतिनिधीत्व करणारे महाराष्ट्रातील खेळाडू देशासाठी पदक जिंकून परत येतील, असा विश्वास त्यांनी व्यक्त करून ऑलिम्पिक दिनानिमित्त शुभेच्छा दिल्या.
जागतिक ऑलिम्पिक दिनानिमित्त महाराष्ट्र ऑलिम्पिक असोसिएशनतर्फे पुणे येथे ऑलिम्पिक डे २०२१ कार्यक्रमाचे आयोजन करण्यात आले होते. उपमुख्यमंत्री तथा महाराष्ट्र ऑलिम्पिक असोसिएशनचे अध्यक्ष अजित पवार हे कार्यक्रमाला ऑनलाईन उपस्थित होते. क्रीडाआयुक्त ओमप्रकाश बकोरिया, महाराष्ट्र ऑलिंपिक असोसिएशनचे महासचिव बाळासाहेब लांडगे, पदाधिकारी प्रकाश तुळपुळे, नामदेव शिरगावकर, सुंदर अय्यर, धनंजय भोसले, दयानंद कुमार आदींसह ऑलिम्पिक आंतरराष्ट्रीय व स्पर्धांमध्ये प्रतिनिधीत्व केलेले तसेच उदयोन्मुख खेळाडू, क्रीडाकार्यकर्ते, क्रीडारसिक मोठ्या संख्येने उपस्थित होते.
टोकियो ऑलिम्पिकसाठी निवड झालेल्या राही सरनोबत (नेमबाजी), तेजस्विनी सावंत (नेमबाजी), प्रविण जाधव (तिरंदाजी), अविनाश साबळे (अॅथलेटिक्स), चिराग शेट्टी (बॅडमिंटन), स्वरुप उन्हाळकर (पॅरा) शुटींग), सुयश जाधव (पॅरा जलतरण) यांच्यासह माजी ऑलिम्पिक खेळाडूंचाही यावेळी ऑनलाईन सत्कार करण्यात आला.
उपमुख्यमंत्री अजित पवार म्हणाले की, जागतिक ऑलिम्पिक दिन साजरा करत असताना १९५२ च्या हेलसिंकी ऑलिम्पिकमध्ये देशाला पहिले वैयक्तिक ऑलिंपिक पदक जिंकून देणाऱ्या पैलवान खाशाबा जाधव यांची आठवण होते. पैलवान खाशाबा जाधवांच्या रुपाने देशाला पहिले वैयक्तिक ऑलिंपिक पदक महाराष्ट्राच्या सुपुत्राने मिळवून दिले होते. येत्या जुलै महिन्यात जपानमध्ये होणान्या ऑलिम्पिक स्पर्धेत महाराष्ट्रातून सात खेळाडू सहभागी होत आहेत. राज्य सरकार पूर्ण ताकदीने खेळाडूंच्या पाठीशी उभे आहे. ते पुढे म्हणाले की, टोकियों ऑलिंपिकमध्ये पदक जिंकण्याच्या जिद्दीने जात असताना, खेळाडूंनी प्रशिक्षक, मॅनेजर, संपूर्ण टीमने कोरोनापासून बचावाची काळजी घ्यावी. जपानमध्ये कोरोनाचे प्रमाण कमी असले तरी अनेक देशातून तिथे खेळाडू येणार आहेत. त्यामुळे भारतीय संघाच्या प्रत्येक खेळाडूंनी, सपोर्ट टीम सदस्यांनी आपली व सहकान्यांची काळजी घ्यावी. कोरोना प्रतिबंधक नियमांचे पालन करावे. ऑलिम्पिकसाठी जाणान्या भारतीय संघासाठी चिनी प्रायोजक कंपन्यांना टाळावे.
जागतिक ऑलिम्पिक संघटना असो की महाराष्ट्र ऑलिम्पिक संघटना, खेळांच्या माध्यमातून समाजात एकता, समता, बंधुता, खिलाडूपणाची भावना रुजवण्याचा, सुसंस्कृत, समर्थ, सशक्त, निरोगी समाज घडविण्याचा प्रयत्न राज्यातील देशातील क्रीडा संघटना व क्रीडा कार्यकर्ते करत असतात, असे ते म्हणाले.
राज्यातील क्रीडा कार्यकर्त्यांच्या क्रीडा सेवेबद्दल कृतज्ञता व्यक्त करून महाराष्ट्र ऑलिम्पिक असोसिएशनचे अध्यक्ष अजित पवार यांनी जागतिक ऑलिम्पिक दिनाच्या निमित्ताने राज्यातील खेळाडू, क्रीडाकार्यकर्ते, क्रीडारसिकांना शुभेच्छा दिल्या.